May 2, 2022 
தண்டோரா குழு
தமிழ் இணையக் கல்விக்கழகம் சார்பில் நடத்தப்பட்ட திருக்குறள் குறளோவியப் போட்டியில் வெற்றி பெற்ற பள்ளி மற்றும் கல்லூரியைச் சேர்ந்த 24 மாணவ, மாணவியர்களுக்கு பரிசுத்தொகைக்கான காசோலை மற்றும் சான்றிதழ்களை ஆட்சியர் சமீரன் வழங்கி பாராட்டினார்.
தமிழ் இணையக் கல்விக்கழகம் சார்பில் ‘‘தீராக் காதல் திருக்குறள்” என்ற பெயரில் தீந்தமிழ் நிகழ்ச்சிகள் நடத்தப்பட்டது.இந்நிகழ்ச்சியில் மாநில அளவில் பள்ளி மற்றும் கல்லூரி மாணவர்களுக்கென ‘‘குறளோவியம்\” என்ற பெயரில் ஓவியப் போட்டி நடைபெற்றது. இப்போட்டியில் சிறந்த 365 ஓவியங்கள் தேர்வு செய்யப்பட்டன.
போட்டியில் வெற்றி பெற்று முதல் மூன்று இடங்களை பெற்ற பள்ளி மற்றும் கல்லூரி மாணவர்களுக்கு தமிழக முதலமைச்சரால் பரிசுகள் வழங்கப்பட்டன.இதன் ஒரு பகுதியாக குறளோவியப் போட்டியில் வெற்றி பெற்ற கோவை மாவட்டத்தைச் சேர்ந்த 4 மாணவியர்களுக்கு தலா ரூ.5 ஆயிரம் ஊக்க பரிசுத்தொகைக்கான காசோலை மற்றும் சான்றிதழ்களையும், 20 மாணவ, மாணவியர்களுக்கு ரூ.1000 சிறப்பு பரிசுத்தொகைக்கான காசோலை மற்றும் சான்றிதழ்களையும் ஆட்சியர் சமீரன் வழங்கி பாராட்டினார்.
இந்நிகழ்ச்சியில் பொள்ளாச்சி சப் கலெக்டர் தாக்கரே சுபம் ஞானதேவ்ராவ், செய்தி மக்கள் தொடர்பு அலுவலர் செந்தில் அண்ணா உட்பட பலர் கலந்து கொண்டனர்.
For English News
