October 1, 2022 
தண்டோரா குழு
கோவை ரேஸ்கோர்ஸ் பகுதியில் ஸ்மார்ட் சிட்டி திட்ட பணிகள் நடைபெற்று வருகின்றன. இப்பகுதியில் அலங்கார வளைவுகள், பூங்காக்கள் அமைப்பது, மிதிவண்டி நடைபாதை அமைப்பது போன்ற பணிகள் மிகவும் தீவிரமாக நடைபெற்று வருகின்றன.இதில் ரேஸ்கோர்ஸ் பகுதியில் சேகரமாகும் மழைநீரை நிலத்துக்குள் அனுப்பும் திட்டமும் செயல்படுத்தப்பட்டு வருகிறது.
இதுகுறித்து இப்பணியில் ஈடுபட்டுள்ள தனியார் நிறுவன அதிகாரி ஒருவர் கூறியதாவது:
ரேஸ்கோர்ஸ் சாலையில் அமைக்கப்படும் மிதிவண்டி பாதையின் கீழே இந்த வடிகால் அமைக்கப்படுகிறது. ஒரு குறிப்பிட்ட பகுதியில் சேகரமாகும் மழைநீர் இந்த வடிகால் வழியாக சுமார் ஒரு கிலோ மீட்டர் தூரம் வரை பயணித்து, அருகே நாங்கள் அமைக்கும் சுத்திகரிப்பு தொட்டிக்கு சென்று சுத்தமாகி நிலத்துக்குள் மீண்டும் செல்லும். மழைநீர் சேமிப்பை அரசு வலியுறுத்தி வருகிறது. மழைநீர் சேமிப்பு தொடர்பாக பல்வேறு விழிப்புணர்வுகளும் ஏற்படுத்தப்படுகின்றன. இப்பணிகள் 95 சதவீதம் நிறைவடைந்துள்ளன. இவ்வாறு அவர் கூறினார்.
For English News
