March 27, 2017 
தண்டோரா குழு
இந்து முன்னணி பிரமுகர் சசிகுமார் கொலை வழக்கில் கைது செய்யப்பட்ட அபுதாகீரை சிபிசிஐடி காவல் துறையினர் காவலில் எடுத்து விசாரிக்க அனுமதி கோரிய மனு மீதான விசாரணையை நாளைக்கு ஒத்தி வைத்து கோவை தலைமை குற்றவியல் நடுவர் நீதிமன்ற நீதிபதி உத்தரவிட்டார்.
கடந்த ஆண்டு செப்டம்பர் மாதம் இந்து முன்னணி பிரமுகர் சசி குமார் படுகொலை செய்யப்பட்டது தொடர்பாக சையது அபுதாகீரை சி.பி.சி.ஐ.டி காவல்துறையினர் கடந்த 22 ஆம் தேதி கைது செய்து,கோவை தலைமை குற்றவியல் நடுவர் நீதிமன்ற உத்தரவு படி சிறையில் அடைத்தனர்.
சி.பி.சி.ஐ.டி காவல்துறையினர் காவலில் எடுத்து விசாரணை மேற்கொள்ள கடந்த வெள்ளியன்று நீதிமன்றத்தில் மனு தாக்கல் செய்தனர். அம்மனு மீதான விசாரணை மேற்கொள்ள ,அபுதாகீர் இன்று நீதிமன்றத்திற்கு அழைத்து வரப்பட்டார்.
சி.பி.சி.ஐ.டி காவலில் வைத்து விசாரிக்க தலைமை குற்றவியல் நடுவர் நீதிமன்றத்தில் தாக்கல் செய்யப்பட்ட மனு மீது விசாரணை நடைபெற்றது. சி.பி.சி.ஐ.டி காவலில் வைத்து விசாரணை செய்ய அபுதாகீர் தரப்பு எதிர்ப்பு தெரிவித்தனர். இதனையடுத்து விசாரணை நாளை ஒத்தி வைத்து நீதிபதி மதுரசேகரன் உத்தரவிட்டார் .
For English News
