May 24, 2017 
தண்டோரா குழு
எஸ்.எஸ்.ராஜமெளலி இயக்கிய ‘பாகுபலி 2’ படத்தின் மாபெரும் வெற்றியை தொடர்ந்து இந்தியாவில் பெரிய பட்ஜெட் படங்கள் தயாரிக்கும் முயற்சிகள் அதிகரித்து கொண்டே வருகிறது.
சமீபத்தில் இராமாயணம் திரைப்படத்தை ரூ.500 கோடி பட்ஜெட்டில் உருவாக்கவுள்ளதாக வெளிவந்த செய்திகள் வெளிவந்தன. இந்நிலையில் தற்போது ரூ.1000 கோடி பட்ஜெட்டில் மகாபாரதத்தை தழுவி ஒரு திரைப்படம் உருவாகவுள்ளதாக செய்திகள் வெளிவந்துள்ளது.
பிரபல மலையாள எழுத்தாளர் வாசுதேவன் நாயர்மகாபாரத இதிகாசத்தின் முக்கிய கேரக்டரான ‘பீமன்’ கேரக்டரை தழுவி எழுதிய நாவல் ஒன்று தற்போது ரூ.1000 கோடி பட்ஜெட்டில் படமாக்க திட்டமிடப்பட்டுள்ளது. இப்படம் கிட்டத்தட்ட இந்தியாவில் உள்ள அனைத்து முக்கிய மொழிகளிலும் தயாராகவுள்ளதாக கூறப்படுகிறது.
பீமன் கேரக்டரில் மோகன்லால் நடிக்கவுள்ளதாகவும் ‘கர்ணன்’ கேரக்டரில் நடிக்க பிரபல தெலுங்கு நடிகர் நாகார்ஜூனனை படக்குழுவினர் அணுகியிருப்பதாகவும் செய்திகள் வெளிவந்துள்ளது.
‘எனது கேரக்டர் குறித்து முழுமையாக தெரிந்து கொண்டு அதன் பின்னர் இந்த படத்தில் நடிப்பது குறித்து எனது முடிவை தெரிவிப்பேன்’ நாகார்ஜூனன் கூறியுள்ளார்.
இவர்களை தவிர இப்படத்தின் முக்கிய கேரக்டர்களில் கமல்ஹாசன், அமிதாப்பச்சன் உள்பட பல முன்னணி நடிகர்கள் நடிக்கவுள்ளதாகவும், இந்தியாவின் மிக அதிக பட்ஜெட்டில் உருவாகவுள்ள இந்த படம் குறித்த அதிகாரபூர்வமான தகவல் விரைவில் வெளிவரும் என்றும் கூறப்படுகிறது.
For English News
