November 26, 2016 
தண்டோரா குழு
மத்திய அரசின் ரூபாய் 500,1000 நோட்டுகள் செல்லாது என்ற அறிவிப்பை எதிர்த்து தமிழ்நாடு வணிகர் சங்க பேரவை தமிழகம் முழுவதும் திங்கட்கிழமை (நவம்பர் 28) முழுக் கடை அடைப்பு செய்ய அழைப்பு விடுத்துள்ளது.
தமிழ்நாடு வணிகர் சங்கங்களின் பேரவை நிர்வாகிகள் கூட்டம் சென்னையில் சனிக்கிழமை நடைபெற்றது. அதில் ரூபாய் 500, 1000 நோட்டுக்கள் செல்லாது என மத்திய அரசு அறிவித்துள்ளதால் சில்லறை வணிகர்கள் பாதிக்கப்படுவது குறித்து ஆலோசிக்கப்பட்டது.
ஆலோசனை முடிவில், மத்திய அரசைக் கண்டிக்கும் விதமாக வரும் திங்கள்கிழமை தமிழகம் முழுவதும் கடையடைப்பு நடத்துவது என கூட்டத்தில் முடிவு செய்யப்பட்டது.
இதுகுறித்து வணிகர் சங்க பேரவை தலைவர் த.வெள்ளையன் செய்தியாளர்களிடம் கூறியதாவது:
ரூபாய் நோட்டுக்கள் செல்லாது என்ற பிரதமர் மோடியின் அறிவிப்பு சாமானிய மக்கள் கைகளில் பண நடமாட்டம் இருக்கக் கூடாது, சில்லறை வணிகர்களின் கடைகளில் வியாபாரம் நடக்கக் கூடாது என்ற உள்நோக்கம் கொண்டது.
ஆன்லைன் வணிகத்தை நோக்கி மக்களைத் திருப்பும் மோசடித் திட்டம். வணிகர் சங்க பேரவை சார்பில் ஏற்கனவே தமிழகமெங்கும் அனைத்து மாவட்டங்களிலும் ஆர்ப்பாட்டம் நடத்தி எங்கள் எதிர்ப்பைத் தெரிவித்தோம்.
ஆனால், வணிகர்கள் மற்றும் மக்களின் உணர்வுகளை மத்திய அரசு மதிக்கவில்லை. உள்நாட்டு சில்லறை வணிகத்தை அழிக்கச் செய்யப்பட்டிருக்கும் இந்த மோசடியை எதிர்த்து கம்யூனிஸ்டு கட்சிகள் போராட்டங்கள் அறிவித்து உள்ளன.
இந்தப் போராட்டங்களுக்கு வணிகர்களின் ஆதரவை தெரிவிக்கும் விதத்தில் திங்கட்கிழமை தமிழகம் முழுவதும் முழுக் கடையடைப்பு செய்வது என்று தமிழ்நாடு வணிகர் சங்கங்களின் பேரவை முடிவெடுத்திருக்கிறது. தமிழகம் முழுவதும் 50 லட்சத்திற்கும் மேற்பட்ட வணிகர்கள் இந்த கடையடைப்பில் பங்கேற்பார்கள்.
இவ்வாறு அவர் கூறினார்.
For English News
