May 29, 2022 
தண்டோரா குழு
கோயம்புத்தூர் மாவட்ட கூடைப்பந்து கழகம் சார்பில் அகில இந்திய அளவிலான 55 – வது ஆண்டு ஆண்களுக்கான நாச்சிமுத்து கவுண்டர் கோப்பை மற்றும் 19 – வது ஆண்டு பெண்களுக்கான சி.ஆர்.ஐ. பம்ப்ஸ் கோப்பை கூடைப்பந்து போட்டிகள் கோவையில் இன்று துவங்கியது. இப்போட்டிகள் வரும் 3-ம் தேதி வரை 6 நாட்கள் நடைபெறவுள்ளது.
இப்போட்டிகளில் அகில இந்திய அளவில் முன்னணியில் உள்ள 9 ஆண்கள் அணியும் 8 பெண்கள் அணிகளும் கலந்து கொண்டுள்ளன. இந்த போட்டிகள் கோவை வ.உ.சி. பூங்கா மாநகராட்சி விளையாட்டு அரங்கத்தில் தினமும் மாலை 5.00 மணிக்கு துவங்கி இரவு 9.00 மணி வரை நடைபெறும். இப்போட்டிக்கு பார்வையாளர்களுக்கு அனுமதி இலவசம்.
ஆண்கள் பிரிவில் “புது டெல்லி” – இந்தியன் ரயில்வே அணி, “புது டெல்லி” – இந்திய விமானப்படை அணி, “லோனாவாலா” – இந்திய கப்பல் படை அணி, “திருவனந்தபுரம்” – கேரளா மாநில மின்சார வாரியம் அணி, “பெங்களூரு” – பாங்க் ஆப் பரோடா அணி, “சென்னை” – ஸ்போர்ட்ஸ் ஹால்டல் அஃப் எக்ஸலன்ஸ் அணி, “சென்னை” – தமிழ்நாடு கூடைப்பந்து கழகம் TRW அணி, “திருவனந்தபுரம்” – கேரளா போலீஸ் அணி மற்றும் “கோயம்புத்தூர்” – கோவை மாவட்ட கூடைப்பந்து கழக அணி ஆகிய 9 அணிகள் விளையாடுகின்றன.
பெண்கள் பிரிவில் “கொல்கத்தா” – கிழக்கு இரயில்வே அணி, “ஹுபிளி” – தென்மேற்கு இரயில்வே அணி, “செகந்திராபாத்” – தென் மத்திய இரயில்வே அணி, “மும்பை” மத்திய இரயில்வே அணி, “திருவனந்தபுரம்” – கேரளா மாநில மின்சார வாரியம் அணி, “திருவனந்தபுரம்” – கேரளா போலீஸ் அணி, “சென்னை” – ரைசிங் ஸ்டார் அணி, மற்றும் “கோயம்புத்தூர்” – கோவை மாவட்ட கூடைப்பந்து கழக அணி ஆகிய 8 அணிகள் விளையாடுகின்றன.
ஆண்கள் பிரிவில் வெற்றி பெறும் அணிக்கு முதல் பரிசு ரூ.1,00,000.00 மற்றும் நாச்சிமுத்து கவுண்டர் சுழற்கோப்பையும், இரண்டாம் பரிசாக ரூ.50,000.00 மற்றும் டாக்டர். என். மகாலிங்கம் கோப்பையும், மூன்றாம் இடம் பிடிக்கும் அணிக்கு பரிசாக ரூ.20,000.00, நான்காம் இடம்பிடிக்கும் அணிக்கு ரூ.15,000.00 – மும், மேலும் தேர்வு செய்யப்பட்ட அணிக்கு நன்நடத்தை ரேணுகா ராமநாதன் நினைவு விருது வழங்கப்படும்.
பெண்கள் பிரிவில் வெற்றி பெறும் அணிக்கு முதல் பரிசு ரூ.50,000.00 மற்றும் சி.ஆர்.ஐ. பம்ப்ஸ் சுழற் கோப்பையும், இரண்டாம் பரிசாக ரூ.25,000.00 மற்றும் சுழற் கோப்பையும் மூன்றாம் இடம் பிடிக்கும் அணிக்கு பரிசாக ரூ.15,000.00இ நான்காம் இடம் பிடிக்கும் அணிக்கு ரூ.10,000.00-மும், மேலும் இத்தொடரில் சிறப்பாக விளையாடும் வீராங்கனைக்கு சிறந்த விளையாட்டு வீராங்கனை என்ற விருதும் வழங்கப்படும்.
இன்று துவங்கிய இப்போட்டிகள் ஜுன் 1 வரை சுழல் முறையிலும், பின்பு ஒவ்வொரு முதல் இரண்டு இடங்கள் பெறும் அணிகள் அறையிறுதிக்கும் தகுதி பெறும். இதில் வெற்றி பெறும் அணிகள் ஜுன் 3 – ம் தேதி நடைபெறும் இறுதி போட்டியில் விளையாடுவார்கள்.
இப்போட்டிகளின் துவக்க விழா இன்று 2022 மே 29 – ம் தேதி நடைபெற்றது. போட்டியை கோவை மாநகராட்சி துணை மேயர் ஆர். வெற்றிசெல்வன் சிறப்பு விருந்தினர்களாகக் கலந்து கொண்டு போட்டிகளை துவக்கி வைத்தார். மேலும் கௌரவ விருந்தினராக ஆர்த்தோ ஓன் மருத்துவமனையின் தலைவர் மற்றும் நிர்வாக இயக்குனர் “டாக்டர். டேவிட் வி. ராஜன்” கலந்து கொண்டார்.
இன்று (29.05.2022) 55-வது நாச்சிமுத்து கோப்பை ஆண்கள் பிரிவின் முதல் போட்டி துவங்கியது. முன்னதாக மாலை 5.00 மணிக்கு துவங்கிய முதல் போட்டியில் சென்னை, ஸ்போர்ட்ஸ் ஹாஸ்டல் ஆஃப் எக்ஸலன்ஸ் அணியை எதிர்த்து திருவனந்தபுரம் கேரளா மாநில மின்சார வாரியம் அணி விளையாடியது. இதில் கேரளா மாநில மின்சார வாரியம் அணி 74 புள்ளிகள் எடுத்து வெற்றி பெற்றது (சரத் எ. எஸ் 24, ராகுல் சரத் 23, சுகித்நாத் 7). எதிர்த்து விளையாடிய ஸ்போர்ட்ஸ் ஹாஸ்டல் ஆஃப் எக்ஸலன்ஸ் அணி 65 எடுத்து தோல்வியடைந்தது (பி. சூர்யா 20, ஆனந்தராஜ் 12, கார்த்திக் 12).
இரண்டாவது போட்டியில் புது டெல்லி, இந்தியன் இரயில்வேஸ் அணியை எதிர்த்து திருவனந்தபுரம், கேரளா போலீஸ் அணி விளையாடியது. இதில் இந்தியன் இரயில்வேஸ் அணி 72 புள்ளிகள் எடுத்து வெற்றிபெற்றது பிரவின் குமார் 15, விஜய் 13, குமரன் கான் 12). எதிர்த்து விளையாடிய கேரளா போலீஸ் அணி 58 புள்ளிகள் எடுத்து தோல்வியடைந்தது (ஆண்டனி ஜான்சன் 18, முகமது ஷிரப் 17, பிரேம் பிரகாஷ் 11).
மூன்றாவது போட்டியில் லோனாவாலா, இந்திய கப்பல் படை அணியை எதிர்த்து கோவை மாவட்ட கூடைப்பந்து அணி விளையாடியது. இதில் இந்திய கப்பல் படை அணி 101 புள்ளிகள் எடுத்து வெற்றிபெற்றது (கவுரவ் சண்டேல் 29, அகிலேஷ் குமார் 18, மன்தீப் சிங் 14). எதிர்த்து விளையாடிய கோவை மாவட்ட கூடைப்பந்து அணி 63 புள்ளிகள் எடுத்து தோல்வியடைந்தது (ஜி. நரேஷ் 15, எஸ். மணிகண்டன் 13, எ.பி. நவனீத் 12).
நான்காவது போட்டியில் புது டெல்லி, இந்திய விமானப்படை அணியை எதிர்த்து பெங்களூரு, பேங்க் ஆஃப் பரோடா வங்கி அணி விளையாடியது. இதில் பேங்க் ஆஃப் பரோடா அணி 82 புள்ளிகள் எடுத்து வெற்றிபெற்றது (கார்த்திகேயன் 21, ஹரிஷ் 18, நாகராஜ் 13). எதிர்த்து விளையாடிய இந்திய விமானப்படை அணி 78 புள்ளிகள் எடுத்து தோல்வியடைந்தது (நிக்கில் 23, ரோகித் 13, ராஜன் 12).
19-வது சி.ஆர்.ஐ. பம்ப்ஸ் பெண்களுக்கான முதல் போட்டியில் திருவனந்தபுரம், கேரளா போலீஸ் அணியை எதிர்த்து சென்னை, ரைசிங் ஸ்டார் அணி விளையாடியது. இதில் கேரளா போலீஸ் அணி 70 புள்ளிகள் எடுத்து வெற்றிபெற்றது (அதுல்யா 18, ஐஸ்வர்யா சாபு 15, ஆதிரா எம்.எஸ் 15. எதிர்த்து விளையாடிய ரைசிங் ஸ்டார் அணி 64 புள்ளிகள் எடுத்து தோல்வியடைந்தது சுருதி 26, மோனிகா 12, லக்ஷ்மி 9).
இரண்டாவது போட்டியில் மும்பை, மத்திய இரயில்வே அணியை எதிர்த்து கோயம்புத்தூர் மாவட்ட கூடைப்பந்து கழக அணி விளையாடியது. இதில் மத்திய இரயில்வே அணி 66 புள்ளிகள் எடுத்து வெற்றிபெற்றது காயத்திரி எஸ். 27, ரிதிமா கேம்கர் 15, இஷிகா கஹ்லோட் 12). எதிர்த்து விளையாடிய கோயம்புத்தூர் மாவட்ட கூடைப்பந்து கழக அணி 62 புள்ளிகள் எடுத்து தோல்வியடைந்தது சுஷ்மிதா 20, அல்பியோ ஜான் 16, மகேஷ்வரி 14).
For English News
