December 20, 2022 
தண்டோரா குழு
கேரள மாநிலத்தில் பறவைக் காய்ச்சல் பாதிப்பு மீண்டும் உருவாகி உள்ளது. கேரள மாநிலம் கோட்டயம் மாவட்டத்தில் உள்ள ஆர்ப்புக்கரை, தலயாழம் பகுதியில் உள்ள பண்ணைகளில் இருந்த வாத்து, பறவைகள் திடீரென செத்து மடிந்தன. இதையடுத்து, கால்நடைத் துறையினரும் சுகாதாரத் துறையினரும் இந்த பண்ணைகளில் ஆய்வு நடத்தியபோது பறவைக் காய்ச்சல் பாதிப்பு இருப்பது உறுதியானது.
இதையடுத்து பறவைக்காய்ச்சல் பாதிப்புக்குள்ளான வாத்து, கோழிகளை அழிக்க உத்தரவு விட்ட நிலையில், கோட்டயம் மாவட்டத்தில் 8,000 வாத்து, கோழிகள் அன்மையில் அழிக்கப்பட்டன. மேலும் 20 ஆயிரம் வாத்து, கோழிகள் போன்ற பறவைகள் அழிக்கப்பட உள்ளதாகவும் தகவல்கள் வெளிவருகின்றன.
இந்த பறவைக்காய்ச்சல் பாதிப்பின் எதிரொலியாக தமிழகத்தில் கேரளா மாநிலத்தையொட்டி உள்ள அனைத்து மாவட்டங்களிலும் கோழி பண்ணைகள், வாத்து பண்ணைகள் போன்றவற்றில் நோய்த் தடுப்பு முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.கேரளா மாநிலத்தையொட்டி உள்ள கோவை மாவட்டத்தில் வாளையார், வேலந்தாவளம் உள்ளிட்ட 10க்கும் மேற்பட்ட பகுதிகள் வழியாக கேரளா மாநிலம் வாகனங்கள் கோவைக்கு வருகின்றன. இதனை அடுத்து அனைத்து சோதனைச்சாவடிகளிலும் பறவைக்காய்ச்சல் தொடர்பாக கண்காணிப்புகள் தீவிரப்படுத்தப்பட்டுள்ளன.
கேரளாவில் இருந்து வரும் அனைத்து வாகனங்களின் டயர்களில் கிருமி நாசினி தெளிக்கப்படுகின்றன. இதனிடையே, கோவை மாவட்டத்தில் கோழிகள் வெளி மாநிலங்களுக்கு அனுப்புவது தேக்கம் அடைந்து வருகிறது. இதனால், வியாபாரிகள் பெருமளவில் நஷ்டம் அடைவார்கள் என கோழி இறைச்சி மற்றும் கோழி பண்ணை உரிமையாளர்கள் வேதனை தெரிவித்துள்ளனர்.
இது குறித்து கோழி பண்ணை உரிமையாளர்கள் கூறுகையில்,
‘‘தமிழகத்தில் இதுவரை பறவை காய்ச்சல் நோய் வந்தது இல்லை. தமிழகத்தில் மிகவும் சுத்தமாகவும், சுகாதாரமாகவும் கோழிகள் வளர்க்கப்படுகின்றன. கோவை, திருப்பூர் மாவட்டத்தில் இருந்து மட்டும் கேரளாவிற்கு மாதந்தோறும் சராசரியாக 2 கோடி கிலோ கறிக்கோழிகள் அனுப்பப்படுகின்றன. பறவை காய்ச்சல் எதிரொலியாக இது தற்போது தேக்கம் அடைந்து வருகின்றன. கோழி இறைச்சிகளை நன்கு வேக வைத்து சமைத்து சாப்பிடலாம். கிறிஸ்மஸ், புத்தாண்டு விழாக்கள் அடுத்தடுத்து வரவுள்ள நிலையில் இவ்வாறான இக்கட்டான சூழ்நிலை மிகவும் வருந்தத்தக்கது’’ என்றனர்.
கோவை மாவட்டத்தில் உள்ள அனைத்து கோழிப்பண்ணைகளும் கண்காணிக்கப்படுகின்றன. இது குறித்து கோவை மாவட்ட ஆட்சியர் சமீரன் கூறியிருப்பதாவது:
மாவட்டத்தின் அனைத்து எல்லை சோதனைச்சாவடிகளும் கண்காணிக்கப்பட்டு வருகின்றன. கோவையில் உள்ள கோழிப்பண்ணைகள் அனைத்தும் மாவட்ட நிர்வாகத்தின் மேற்பார்வையில் உள்ளன. தீவிரமாக கண்காணிக்கப்பட்டு வருகின்றன. அனைத்து சுகாதாரத்துறை ஊழியர்களுக்கும் தகுந்த ஆலோசனைகள் வழங்கப்பட்டுள்ளன. கோவை மாவட்டத்தில் தற்போது பறவைக்காய்ச்சல் பாதிப்பு எதுவும் இல்லை. மக்கள் பீதியும் அச்சமும் அடைய வேண்டாம்.
இவ்வாறு அவர் கூறினார்.
For English News
