November 15, 2016 
தண்டோரா குழு
சில்லறைப் பிரச்சினைக்கு தீர்வு காணும் வகையில் ஏ.டி.எம்., இயந்திரங்களில் ரூ.20 மற்றும் ரூ.50 நோட்டுகளை விநியோகிப்பது விரைவில் தொடங்கும் என்று பாரத ஸ்டேட் வங்கியின் தலைவர் அருந்ததி பட்டாச்சார்யா செவ்வாய்க்கிழமை தெரிவித்தார்.
பழைய ரூ 500, ரூ 1000 செல்லாது என பிரதமர் மோடி நவம்பர் 8ம் தேதி அறிவித்தார். இதனால் அத்தியாவசியப் பொருட்களை வாங்க பெரிதும் சிரமப்பட்டனர். குறிப்பாக சிறு, குறு வியாபாரிகள், ஆட்டோ ஓட்டுநர்கள், கூலித் தொழிலாளிகள் ரூபாய் 500, ரூபாய் 1000 நோட்டுகளை மாற்ற சில்லறை இல்லாமல் தவித்து வருகின்றனர்.
வங்கிகளில் பழைய ரூ 500, ரூ 1000 நோட்டுகளை மாற்றினாலும் வாடிக்கையாளர்களுக்கு புதிய ரூ. 2௦௦௦ தான் அதிக அளவு வழங்கப்படுகிறது.
ஏ.டி.எம். மையங்களில் ரூ 100 மட்டும்தான் வருகிறது. இந்த பிரச்சினையைப் போக்க ஏ.டி.எம் களில் ரூ.20 மற்றும் ரூ.50 நோட்டுக்கள் விநியோகம் விரைவில் தொடங்கும் என பாரத ஸ்டேட் வங்கி அறிவித்துள்ளது.
இது குறித்து மும்பையில் செய்தியாளர்களுக்கு பாரத ஸ்டேட் வங்கி தலைவர் அருந்ததி பட்டாச்சார்யா செவ்வாய்க்கிழமை அளித்த பேட்டி:
தென் மாநிலங்களில் வங்கிகளின் வேலைப்பளு 50 சதவீதம் குறைந்துவிட்டது. இதன் மூலம் தங்கள் தேவைக்கு ஏற்ப பணம் கிடைக்கும் என மக்கள் நம்ப தொடங்கியுள்ளனர்.
ரூ.100 நோட்டுகளுக்கான எண்ணிக்கை கட்டுப்பாடு மற்றும் புதிய ரூபாய் நோட்டுக்களின் வடிவம் காரணமாகவே ஏடிஎம் இயந்திரங்களில் விரைவில் ரூபாய் நோட்டுகள் தீர்ந்து விடுகின்றன.
இந்தப் பிரச்சினையைத் தீர்க்க ஏ.டி.எம்., இயந்திரங்கள் மூலம் ரூ.20 மற்றும் ரூ.50 நோட்டுகள் விரைவில் விநியோகம் செய்யப்படும்.இவ்வாறு அருந்ததி பட்டாச்சார்யா கூறினார்.
For English News
