November 17, 2018 
தண்டோரா குழு
கஜா புயல் பாதித்த நாகை மாவட்டத்தை திமுக தலைவர் நேரில் சென்று ஆய்வு மேற்கொண்டு,பாதிக்கப்பட்ட மக்களுக்கு உதவிகளை வழங்கி வருகிறார்.
வங்கக்கடலில் உருவான காற்றழுத்த தாழ்வு பகுதி,புயலாக மாறியது கஜா புயல்.இந்த கஜா புயல் நாகை – வேதாரண்யம் இடையே கரையை கடந்ததாக சென்னை மண்டல வானிலை ஆய்வு மையம் தெரிவித்துள்ளது.மேலும்,இந்த கஜா புயல் நாகை,தஞ்சை, புதுக்கோட்டை மற்றும் திருவாரூர் மாவட்டங்களில் அதிக சேதத்தை ஏற்படுத்தி உள்ளது.
புயலின் கோரத்தாண்டவத்துக்கு தாக்குப் பிடிக்க முடியாமல் தஞ்சை,நாகை,திருவாரூர் மாவட்டங்களில் பல்லாயிரக் கணக்கான மரங்கள் வேரோடு சாய்ந்தன.ஏராளமான மின் கம்பங்களும் சாய்ந்து விழுந்தன.செல்போன் கோபுரங்களும் சரிந்தன.சாலைகளில் மரங்கள் விழுந்ததால் போக்குவரத்து முடங்கியது.மின்சாரமும் துண்டிக்கப்பட்டதால் பல ஊர்கள் இருளில் மூழ்கின.இதனால் மக்கள் பெரிதும் அவதிக்கு ஆளானார்கள்.நாகை மாவட்டத்தில் பல கிராமங்கள் துண்டிக்கப்பட்டு உள்ளன.
கஜா புயலால் இதுவரை 41 பேர் உயிரிழந்துள்ளனர் என பேரிடர் கட்டுப்பாட்டு மையம் தகவல் தெரிவித்துள்ளது.புயல் பாதித்த 10 மாவட்டங்களில் 1,27,448 மரங்கள் விழுந்துள்ளன.புயல் பாதித்த பகுதிகளில் மீட்பு பணிகள் துரிதமாக நடைபெற்று வருகின்றதாகவும் மாநில பேரிடர் கட்டுப்பாட்டு மையம் தகவல் தெரிவித்துள்ளது.
இந்நிலையில்,திமுக தலைவர் மு.க.ஸ்டாலின் இன்று தரைவழி மார்க்கமாக,கஜா புயல் பாதித்த கடலூர் மாவட்டம் முதல் நாகை மாவட்டம் வரையான பகுதிகளை நேரில் ஆய்வு செய்து வருகிறார்.அதன் ஒரு பகுதியாக,நாகை மாவட்டம் தரங்கம்பாடியில் புயல் சேதத்தைப் பார்வையிட்டு,மக்களுக்கு ஆறுதல் கூறிய அவர் தேவையான உதவிப்பொருட்களையும் வழங்கினார்.
இதனைத் தொடர்ந்து,அக்கரைப்பேட்டை பகுதிச் சென்று பார்வையிட்ட மு.க.ஸ்டாலின்,பெரும் பாதிப்புக்கு ஆளாகியுள்ள வேதாரண்யத்திற்கும் நேரில் சென்று புயல் பாதித்துள்ள பகுதிகளையும் அங்குள்ள மக்களையும் சந்திக்கவுள்ளார்.அவருடன் திமுக முன்னாள் அமைச்சர் டி.ஆர். பாலு உள்ளிட்ட ஏராளமான திமுகவினர் உடன் செல்கின்றனர்.
For English News
