December 27, 2018 
தண்டோரா குழு
ஆஸ்திரேலியாவில் சுற்றுப்பயணம் மேற்கொண்டுள்ள இந்திய அணி 3 டி20, 4 டெஸ்ட் மற்றும் 3 ஒருநாள் கொண்ட தொடரில் விளையாடி வருகின்றது. இதில், டி20 தொடர் 1-1 என சமநிலையில் முடிந்தது. தற்போது டெஸ்ட் தொடர் நடைப்பெற்று வருகின்றது. இத்தொடரின் முதல் போட்டியில் இந்தியா 31 ரன்கள் வித்தியாசத்தில் வெற்றி பெற்றது. இரண்டாவது டெஸ்ட் போட்டியில் ஆஸ்திரேலியா வெற்றி பெற்றது. இதன்மூலம் டெஸ்ட் தொடரில் இருஅணிகளும் 1-1 என்ற கணக்கில் சமநிலை பெற்றுள்ளது.
இருஅணிகளுக்கும் இடையிலான மூன்றாவது டெஸ்ட் போட்டி நேற்று மெல்போர்ன் மைதானத்தில் தொடங்கியது. இதில், டாஸ் வென்ற இந்திய அணியின் கேப்டன் விராட் கோலி பேட்டிங் தேர்வு செய்தார். இப்போட்டியில் முரளிவிஜய் மற்றும் கே.எல் ராகுலுக்கு பதில் ஹனுமா விஹாரியும், மயங் அகர்வாலும் துவக்க வீரர்களாக களமிறங்கினர். மயங் அகர்வால் நிதானமாக விளையாட, மறுபுறம் ஹனுமா விஹாரி சிறிது பதற்றத்துடன் விளையாடினார். ஆஸ்திரேலியாவின் வேகப்பந்து வீச்சாளர் பேட் கம்மின்ஸ் வீசிய 19-வது ஓவரில், 2-வது ஸ்லிப்பில் இருந்த பிஞ்ச் இடம் கேட்ச் கொடுத்து விஹாரி (8) ஆட்டமிழந்தார். அறிமுக டெஸ்ட் போட்டியில் சிறப்பாக விளையாடிய அரைசதம் அடித்து மயங் அகர்வால் 76 ரன்கள் எடுத்து பெவிலியன் திரும்பினார்.
பின்னர் வந்த புஜாராவும், கேப்டன் விராட் கோலியும் நிதானமாக விளையாடி இந்திய அணியின் ரன் எண்ணிக்கை உயர்த்தினர். இதையடுத்து, முதல் நாள் ஆட்ட நேரமுடிவில் முதல் நாள் முடிவில் இந்திய அணி 2 விக்கெட் இழப்பிற்கு 215 ரன்கள் எடுத்தது. இந்நிலையில் இன்று இரண்டாவது நாள் ஆட்டம் தொடங்கியது. தொடர்ந்து ஆடிய புஜாரா மற்றும் விராட் சதம் அரைசதம் அடித்தனர். புஜாரா டெஸ்ட் போட்டியில் தனது 17வது சதத்தை 280 பந்துகளில் பூர்த்தி செய்தார். கோலி (82), புஜாரா (106) ரன்களை எடுத்தனர்.
இதையடுத்து, 2ம் நாள் ஆட்டத்தில் 7 விக்கெட் இழப்புக்கு 443 ரன்கள் எடுத்திருந்த போது இந்திய அணி டிக்ளேர் செய்தது. ஆஸ்திரேலிய அணி சார்பில் ஸ்டார்க் 2 விக்கெட்டையும், கம்மின்ஸ் 3 விக்கெட்டையும் கைப்பற்றினர். இதனைத்தொடர்ந்து தனது முதல் இன்னிங்சை தொடங்கிய ஆஸ்திரேலிய அணி 2-ம் நாள் ஆட்ட நேர முடிவில் விக்கெட் இழப்பின்றி 8 ரன்கள் மட்டுமே எடுத்தது. இதனால் இந்திய அணியை விட ஆஸ்திரேலிய அணி 435 ரன்கள் பின் தங்கியுள்ளது.
For English News
